НАЗАД

Вольф Мессингкoд аддзысьлi Сыктывкарын

Бöръя кадö Россияса газет-журнал, телевидение да радио уна гижöны да сёрнитöны нималана экстрасенс Вольф Мессинг йылысь. Неважöн сылы вöлi сиöма и быдса телесериал.

Талун экстрасенсъяснад  миянöс он чуймöд. Мый дон сулалö, шуам, Кашпировский, кодöс телевизор пыр видзöдлiсны уна миллион морт. А миян газетъяслöн лист бокъяссянь йöз дiнö шыöдчывлöны оз этша нималана и абу ёна тöдса экстрасенсъяс, кодъяс  вöзйöны  бурдöдны уна сикас висьöмысь. Но, пöжалуй, Вольф Мессинг кодь  экстрасенсыс мирас этша вöлi. Сэк жö öнiя олысьяс пиысь унаöн оз тöдны, мый коркö сiйö волiс и Сыктывкарö. Ми корим висьталыштны та йылысь паськыда тöдса журналист да гижысь, «Сыктывкар» историко-мемориальнöй да кулыурно-просветительскöй котырöн юрнуöдысь Леонид Лыткинöс, кодi аддзысьлöма да сёрнитöма Вольф Мессингкöд.

—Леонид Александрович, кыдзиджык ставыс вöлi?

—Сiйö кадас уджалi Сыктывдiн районса «За коммунизм» газетын, кодi петiс Выльгортын. Редакторнас вöлi пыдди пуктана морт, ыджыд сяма журналист Феоктист Семёнович Римских. Ме и висьталi сылы, мися, Сыктывкарö воис нималана экстрасенс Вольф Мессинг да колö аддзысьлыны сыкöд, тöдмöдны тайö мортыскöд ассьыным лыддьысьысьясöс.

А вöлi тайö аръявылыс нин. Но стöча ог помнит, кутшöм воö. И луннас, и рытнас драмтеатрын нималана экстрасенслöн вöлiны карса олысьяскöд сiдз шусяна сеансъяс. Веськавны сэтчö эз вöв кокни. Но драмтеатрын директорнас сэки уджалiс меным бура тöдса Николай Николаевич Массальский. Звöнитлi сылы. Сiйö и шуис, мый Москваса гöсьтыд пö торъя йöзкöд оз окотит аддзысьлыны. Но тэ пö коми морт, а татчöс вужвойтыртö сiйö пыдди пуктö. Волы пö да ме сёрнитла сылöн ассистентыскöд. Воан кö пö сьöлöм вылас, тэнад шуд.

Локтi драмтеатрö да пыри мöдар öдзöссяньыс. А ме йылысь юöртöмаöсь нин да корисны драмтеатрса директорлöн жырйö, кöнi и пукалiс Вольф Мессинг.

Медводз сiйö чолöмасис мекöд, шуис менö нимöнвичöн. Висьталiс, кöнi уджала. Содтiс, мый чужлi 1930 воын Сыктывкарын. А сэсся ланьтыштлiс да шыöдчис ме дiнö. Сылы окота вöлi тöдны, кузьöсь абу менам юалöмъясöй. Шуи, мый абу.

—Мый йылысь тi юасинныд сылысь?

—Кори вочавидзны ыджыд гöсьтöс куим юалöм вылö. Ме öд сэки эг на тöд, мый сiйö кадас странаöн веськöдлысь Никита Хрущев эз лэдз Вольф Мессингöс аддзысьлыны гырысь каръясын йöзкöд. Сылы сöмын позис паныдасьлыны страналöн ылi пельöсъясын олысьяскöд. Но сiйö та йылысь эз висьтав.

Медводз юалi сылысь, мыйла воис буретш Сыктывкарö. Нималана гöсьт шуис, мый война кадö пö уна полякöс вöлi эвакуируйтöма буретш тiян карö. А сэсся война помасьöм бöрын öтияс на пиысь бöр мунiсны Польшаö, мöдъяс кольччисны Москваö. Сыктывкарын поляк челядьлы восьтлöмаöсь весиг торъя школа. Полякъяслы зэв ёна воöмаöсь сьöлöм вылас Сыктывкарын олысьяс, кодъяс дасьöсь вöлöм сетны локтöм войтырлы узьланiн. Со и Вольф Мессингыд шуис, мый сылы окота лоöма аддзывны войвывса карсö да сэнi олысьясöс. Сiйöн и воöма Сыктывкарö.

—Кутшöмджык вöлi мöд юалöмыд?

—Шуи, мый сiйö вочавидзлiс нин юалöмъяс вылö уналы, кодъяс кöсйисны тöдны, мый лоö миянкöд водзö вылö. А кутшöм юалöм да сы вылö кутшöм вочакыв, мися, вöлi медся тöдчанаыс. Сiйö и вочавидзис, мый татшöмыс вöлi Сталинкöд, Бериякöд да Пономаренкокöд аддзысьлiгöн. Ме пö вочавидзи налы, мый Великöй Отечественнöй войнаыс помасяс 1945 вося майын.

Но некор пö оз вун и Германияын менам водзвыв висьталöмöй. Сэки пö власьт дорас вöлi нин Гитлер. Ме пö и шуи, мый сiйö босьтас аслас кипод улö ставнас Европасö да уськöдчас Сöветскöй Союз вылö. Но буретш пö тайö странаыс и пасьвартас фашизмöс. Менö пö сэки гестапо кöсйылiс öшöдны. Но гипноз отсöгöн удайтчис пышйыны.

—Мый йылысь нöшта юалiнныд Вольф Мессинглысь?

—Юалi, мися, кывсьö, мый тi матыссаöсь вöлiнныд Сталинкöд да сiйöс кытшалысь йöзкöд. А кыдзи найöс донъяланныд?

Ыджыд гöсьт шуис, Сталинкöд пö паныдасьлi да сёрнитлi унаысь. Сы йылысь пö колисны бур казьтылöмъяс. Но Бериякöд татшöм йитöдъясыс эз артмыны. Сiйö пö пыр лыддис менö немечьяслöн шпионöн, кöсйис пуксьöдны дзескыдiнö да лыйлыны. Но эз лысьт тайöс вöчны Сталинлöн тшöктытöг. А сiдзсö пö ме паныдасьлi и Гитлеркöд, и Геббельскöд, и Канарискöд, и Йозеф Пилсудскийкöд. Быдöн йылысь пö колис аслыссикас казьтылöм.

—Сiйö жö лунас меным удаитчис видзöдны Вольф Мессинглысь петкöдчöмсö драмтеатрлöн ыджыд залын, — водзö висьталö Леонид Александрович. — Уна во мысти нин тöдмапi, мый тайö залас Москваса гöсьтöс видзöдöма и менам гöтыр Мария Михайловна, кодкöд сэки эг на вöлöй тöдсаöсь. А сьöд пашкыр юрсиа Вольф Мессинг тэрыба ветлöдлiс сцена вывтi да вочавидзис пукалысьяслöн юалöмъяс вылö. И со сылысь юалiсны гижöда кабала пыр, кутшöмджык лоас Коми мулöн аскиа луныс. Сiйö пыр жö шуис, мый миян республика — Россияын медся озыр муясысь öти. Водзö вылö сылöн позянлунъясыс зэв гырысьöсь. Сыктывкар пö аслас бумага вöчан ыджыд предприятиеöн кутас нимавны мир пасьта. Татчö пö пондасны волывлыны суйöрсайса войтыр. Республика йылысь бура кутасны тöдны зэв уналаын.

Вöлiны и мукöд юалöмъяс. Став вылас сiйö стöча вочавидзис.

—Драмтеатрысь öтдор кöнкö вöлiны эз Вольф Мессинглöн аддзысьлöмъясыс?

—Талун öткымын газет гижö, мый быттьö сiйö паныдасьлöма и Олег Кошевой нима дас кыкöд номера школаса велöдчысьяскöд да велöдысьяскöд, и Сыктывкарса вöр пилитан заводын уджалысьяскöд. Но зэв бура тöда, мый татшöм аддзысьлöмъясыс эз вöвны. Миян органъяс сюся видзöдiсны Москваса гöсьт бöрся да драмтеатрысь öтдор сiйöс некытчö эз лэдзны петкöдчыны. Да и ачыс эз окотит тайöс вöчны. Oнi телевидение петкöдлiс тайö морт йывсьыс быдса сериал. Кодсюрö шуö, мый главнöй геройыс ньöти оз мун Вольф Мессинг вылö. Но тайö, гашкö, оз и ков. Медтöдчанаыс, мый артистыс кужис гöгöрвоны Вольф Мессинглысь оланрусö, ви-дзöдласъяссö да петкöдлiс сiйöс зэв эскöданаöн.

*    *    *

Со татшöм сёрни артмис журналист-ветеран Леонид Александрович Лыткинкöд, кодi бура на помнитö Вольф Мессингкöд Сыктывкарын аддзысьлöмъяссö. Сiйö кадö öд эз нин сэтшöм тшöкыда волывлыны миянö татшöм нималана гöсьтъясыд. И, дерт жö, та йылысь помнитöны на Сыктывкарса олöма войтыр пиысь унаöн.